Era Generalitat de Catalunya e eth Conselh Generau d’Aran an collaborat ena aquisicion ar Estat d’un edifici de lèu 2.400 m² bastits, plaçat ena zòna de parcatge de Baqueira 1500, en municipi de Naut Aran, damb er objectiu d’incorporar-lo ath patrimòni public e daurir era possibilitat de destinar-lo a abitatge public e assequible.
Aguesta operacion, damb ua inversion de 3,7 milions d’euros, a estat possibla gràcies ara collaboracion institucionau entre era Generalitat de Catalunya e eth Conselh Generau d’Aran. Tanben represente ua oportunitat entà recuperar un immòble que demore en desús dempús de hè ans e incorporar-lo as politiques publiques d’abitatge deth territòri.
Coma prumèra accion, se prevé garantir era seguretat der edifici e deth sòn entorn, atau coma amiar a tèrme es trabalhs de conservacion que siguen de besonh. De manèra parallèla, s’elaborarà un programa foncionau entà determinar es possibles usatges der immòble e es besonhs d’intervencion.
Entà coordinar aguest procès, se constituirà ua comission de trabalh damb era participacion dera Generalitat de Catalunya, eth Conselh Generau d’Aran e er Ajuntament de Naut Aran. Aguesta comission aurà d’analisar es diferentes alternatives d’usatge, es condicionants urbanistics e juridics, e era viabilitat tecnica e economica dera reabilitacion, atau coma definir es diferentes fases de desvolopament deth projècte.
Un recors entà dar responsa as besonhs d’abitatge d’Aran
Era possibla destinacion residenciau der immòble s’includís ena necessitat de disposar d’abitatge estable e assequible en territòri, a on es caracteristiques geografiques e socioeconomiques e era pression sus eth mercat residénciau dificulten er accès ar abitatge a diuèrsi perfils dera poblacion.
Era situacion der abitatge ena Val d’Aran ei condicionada pera disponibilitat limitada d’abitatges destinadi a residéncia abituau. Segontes eth Plan d’Abitatge dera Val d’Aran, sonque eth 36 % des abitatges se destinen a usatge residenciau abituau. Aguesta realitat coincidís damb uns prètzi de crompa-venda nauti e ua aufèrta limitada de loguèr, en un contèxte d’aument des prètzi en conjunt des municipis d’Aran. Aguestes circonstàncies dificulten er accès ar abitatge des persones que vòlen establir-se en territòri o mantier-i era sua residéncia abituau.
Era recuperacion der immòble permeterà disposar d’ua basa patrimoniau sus era quau valorar naues opcions d’abitatge public e assequible en Aran, mejançant era coordinacion entre es administracions implicades e d’acòrd damb es besonhs deth territòri.
