Dempús des mesi d’ostiu, era equipa deth Centre de Lauegi deth Conselh Generau d’Aran auem tornat tara activitat ath torn dera nhèu damb era participacion en International Snow Science Workshop (ISSW) en Whistler, British Columbia, Canadà, era conferéncia internacionau de nhèu e lauegi mès importanta deth mon.
Er ISSW a coma objectiu facilitar er escambi interdisciplinari d’idees e experiéncies entre investigadors e professionaus der estudi dera nhèu e es lauegi. Eth lèma der ISSW ei «Era fusion dera teoria e era practica». Eth ISSW organize ua conferéncia biannau, qu’altèrne entre America deth Nòrd e Euròpa, e qu’amasse investigadors e professionaus de tot eth mon. Es sedences der ISSW an viatjat geograficament pes Estats Units, Euròpa e Canadà dempús dera prumèra edicion, celebrada en Banff (Albèrta) en 1976.
Entre es congrèssi celebradi, eth Centre de Lauegi auem assistit tath de Whistler 2008, Davos 2009, Grenòble 2013, Breckenridge 2016, Innsbruck 2018, Tromso 2024, e ara, nauaments, Whistler 2026.
Damb ues 1400 persones participantes e 359 contribucions entre presentacions oraus e pòsters, er eveniment, de cinc dies de durada, entre eth 28 de seteme e eth 2 d’octobre, s’a hèt en Whistler Conference Center, includida ua jornada de trabalh de camp entà professionaus, e ua jornada de talhèrs dubèrti ath public eth dimèrcles. Tanben i a agut era oportunitat d’organizar o participar en talhèrs posteriors ara conferéncia, eth dia 3 d’octobre.
Eth programa tecnic, plan dinamic, a compdat damb cinc tipes de presentacions principaus:
1. Progrèssi en coneishement: entà presentar e conéisher es trobalhes scientifiques mès auançades, aprendissatges utils entà milhorar era nòsta practica e motivacion entà contribuïr a eishamplar es frontères deth nòste coneishement.
2. Gestion deth risc de lauegi: ath torn d’un sector clau dera gestion deth risc de lauegi (p. ex., corredors de transpòrt, estacions d’esquí, guidatge en terren dehòra de pista, prediccion publica).
Aguesti dus tèmes s’an condusit mejançant sessions-presentacions e, tà acabar, damb un torn de qüestions e responses damb toti es ponents en scenari.
3. Sessions de pòsters
En un entorn relaxat e ideau tà interactuar tant damb es trabalhs presentadi com damb es sòns autors.
4. Sessions tematiques especifiques
Sessions de tarde basades en sector emergent o especializat dera profession restacada damb es lauegi sus exposicion ath risc: es persones en terren de lauegi, terren e cartografia, trabalh en equipa, formacion e resiliéncia, e sistèmes intelligenti.
5. Debats en format de taula redona
En un espaci mès redusit, en Rainbow Theatre, s’an hèt debats sus era IA ena profession restacades damb es lauegi, era evolucion des practiques d’emplec d’explosius, escalada en gèu e aupinisme, e baishades de granes linhes.
Ja se pòden consultar es articles de totes es presentacions oraus e pòsters dera conferéncia e es conferéncies anteriores ena bibliotèca digitau dera Universitat de Montana.
Eth dimèrcles 30, en equador dera conferéncia, se heren diuèrses gessudes de camp. Nosati hérem es visites deth programa de contraròtle de lauegi dera estacion d’esquí de Whistler- Blackcomb e era de solucions d’engenheria e programa de seguretat contra es lauegi ena carretèra Duffey Lake Road deth Ministèri de Transpòrt e Transit.
Dempús de cada dia long e intens, es velhades an estat alegrades damb diuèrsi actes sociaus, entre es quaus volem relheuar era velhada STELLAR a on s’arreconeish a hemnes renomades qu’an hèt contribucions significatives ena sciéncia dera nhèu e es lauegi. Aguesta trobada, que comencèc en ISSW 2006 de Telluride, a hèt un omenatge a hemnes de fòrça païsi qu’an contribuït en toti es aspèctes dera nòsta profession. MERCÉS ath supòrt der ISSW, er American Avalanche Association e era comunitat deth sector, era iniciatiua STELLAR a creishut considerablaments.
Actuauments, tanben s’aufrissen ajudes de viatge entà aufrir supòrt economic as ponents mès joeni der ISSW. Aguest còp, era velhada STELLAR reconeishec ara nòsta tecnica Montse Bacardit pes sòns ja 15 iuèrns consecutius hènt prediccion de lauegi e ath madeish temps desvolopant projèctes de recèrca aplicada, e tanben ara joena Berta Aguirre, que hec un sejorn practic en Centre hè dus iuèrns e actuauments hè eth sòn doctorat sus er estudi deth terren de lauegi e gestion deth risc. Era velhada STELLAR ei, tanben, ua oportunitat tà qu’es persones que s’identifiquen coma hemnes o coma non-binàries en camp dera nhèu e es lauegi se tròben entà hèr contactes e compartir informacion.
Ath delà d’èster presents ena conferéncia, es assistents auem pogut gaudir des montanhes de Whistler e Blackcomb, encara dubèrtes entà activitats de senderisme e bicicleta de montanha en Whistler Bike Park, mondiaument renomat.
En tot seguir damb eth torn fixat de temps e lòc, er ISSW serà de 2028 se harà en Snowbird, Utah, Estats Units.
