Eth Conselh Generau d’Aran, a trauès deth Departament d’Espòrts, a daurit era convocatòria des bèques entà esportistes estudiants corresponentes ath cors 2026-2027, damb er objectiu de dar supòrt as joeni e joenes deth territòri que compatibilizen es sòns estudis damb ua dedicacion esportiva.
Aguesta linha d’ajudes vò contribuir a facilitar eth desvolopament academic e esportiu des esportistes, reconeisher-les er esfòrç, era constància e eth compromís que supause hèr simultanèament ua formacion academica e ua trajectòria esportiva.
A trauès d’aguesta convocatòria, eth Conselh Generau d’Aran vò acompanhar ar alumnat enes diferentes etapes dera sua formacion, ajudar a redusir es dificultats que pòt comportar aguesta dobla dedicacion e afavorir que poguen continuar progressant en aguestes dues disciplines.
Aguest supòrt s’includís ena volontat deth Conselh Generau d’Aran de fomentar er espòrt coma ua airina de desvolopament personau e sociau, d’impulsar eth talent esportiu deth territòri e de generar oportunitats entàs naues generacions.
Presentacion des sollicituds
Es persones interessades pòden presentar era sollicitud a trauès dera Sedença Electronica deth Conselh Generau d’Aran, en aguest ligam Seu Electrònica Conselh Generau d’Aran – Catàleg de tràmits
Eth tèrme de presentacion de sollicituds s’acabarà eth 31 de deseme de 2026.
Es bases dera convocatòria, damb es condicions entà accedir as ajudes, se pòden consultar en aguest ligam Seu Electrònica Conselh Generau d’Aran – Document
Entà quinsevolh dobte o informacion complementària, es persones interessades pòden contactar damb eth Departament d’Espòrts a trauès dera adreça electronica: esports.cga@aran.org.
Damb aguestes ajudes eth Conselh Generau d’Aran vò fomentar eth talent esportiu deth territòri e eth supòrt as joeni que trabalhen cada dia entà hèr compatibla era sua formacion e era sua passion per espòrt.














