Eth Plan d’Accion Comunitària dera Val d’Aran impulse pendent eth mes d’octobre un ample programa d’activitats ath torn dera salut mentau e eth benestar emocionau, damb prepauses dirigides a persones de totes es edats e qu’an coma objectiu generar espacis d’amassada, participacion, reflexion e supòrt, ath madeish temps que se hemna visibilitat as recorsi e espacis comunitaris que ja existissen en territòri.
Era programacion compde damb era participacion d’entitats coma Amentaran, era Associacion Contra eth Càncer e Ágora, atau coma de persones volontàries, e damb era implicacion de servicis sanitaris especializadi coma GSS. Eth conjunt configure ua programacion que vò méter en valor qu’eth benèster emocionau se bastís tanben des dera comunitat, a trauès des ligams, es relacions, era participacion e es espacis de supòrt mutuau.
Charrades e conferéncies damb professionaus e persones referentes
Un des èishi destacadi deth programa son es charrades e conferéncies daurides ara ciutadania, que permeteràn abordar desparièrs ahèrs restacadi damb era salut mentau, es relacions e eth benèster emocionau.
Eth 16 d’octobre, ena sedença d’Amentaran en Bossòst, eth Dr. Florencio Herrero impartirà ua charrada sus es auantatges e desauantatges d’envielhir. Eth 20 d’octobre, era Sala d’Actes deth Conselh Generau d?Aran Acuelherà era session «Salut mentau: parlam d?ansietat E alcoòl», damb era participacion dera Dra. Anna Mont e eth Dr. Jordi Blanch, de Gestion de Servicis Sanitaris, responsables des servicis de Salut Mentau dera Val d?Aran. Era amassada permeterà parlar sobratz salut mentau, ànsia e consum d’alcoòl, atau coma dar a conéisher es recorsi e circuits d’atencion disponibla en territòri.
Eth 22 d’octobre serà eth torn de Jordi Amenós, qu’aufrirà dues prepauses. Pera tarde, eth talhèr «Team Stories» convidarà es joens a escríuer, imaginar e compartir a trauès d’istòries e dinamiques creatives. Posterioraments, ena Bibliotèca Generau de Vielha, aufrirà era charrada «Ath torn deth huec», ua prepausa ath torn dera cauma, era narrativa e era manèra coma explicam e revisam es nòstes pròpries istòries e experiéncies.
Eth programa se barrarà eth 30 d’octobre damb era conferéncia «Enfants e adolescents: naui mauestars, naues qüestions», a cargue de Mario Izcovich, dirigida especiuaments a familhes e professionaus que trabalhen damb mainatges e adolescents. Era session abordarà es naui mauestars ena enfància e era adolescéncia, es ligams, er impacte des pantalhes e eth papèr des adults en acompanhament, en tot méter en valor era escota e era singularitat de cada mainatge e adolescent.
Prepauses entà mainatges, joeni e familhes
Eth programa dedique ua atencion especiau as mainatges, adolescents e joeni, damb activitats que cerquen generar espacis de participacion e expression mès enlà des circuits estrictaments assistenciaus.
Ath delà deth talhèr de narrativa damb Jordi Amenós, era programacion incorpòre accions e prepauses restacades as joens e enes sòns espacis quotidiani, damb especiau preséncia ara Escòla d’Ostalaria de Les e a Connexion Joena.
En aguest airau, destaque tanben era exposicion «Eth cementèri deth temps perdut», d’Audèth de Huec, que pendent eth mes d’octobre se poderà visitar en vestibul dera Escòla d’Ostalaria de Les. Era prepausa convide a soscar sus es moments que deisham de víuer mentre guardam eth mobil e sus aquerò que volem preservar enes nòstes vides.
Activitats entà suenhar-mos e trobar-mos
Era programacion incorpòre tanben activitats que restaquen eth benèster emocionau damb eth movement, era natura e era participacion comunitària.
Entre aguestes i a eth tastet de Qi-Gong, Tai-Txi terapeutic e mindfulness, organizat en Casau deth Jubilat Sant Miquèu de Vielha; era excursion ara Val de Toran, impulsada pera Associacion Ágora d’Aran; e es gessudes de marcha nordica de Vielha e Naut Aran, que combinen activitat fisica, aire liure e relacion damb d’autes persones. Tanben s’includís era caminada «Botja-te contra eth càncer», organizada pera Associacion Contra eth Càncer, atau coma activitats especifiques d’exercici fisic entà pacients oncologics.
Ua guardada comunitària en totes es estapes dera vida
Eth programa incorpòre prepauses dirigides as persones granes, coma era dusau amassada presenciau deth Casau Virtuau, un espaci d’amassada, participacion e relacion que permet compartir experiéncies e refortilhar es ligams entre es persones que participen e que coïncidís damb era commemoracion deth dia Internacionau dera gent grana.
Tanben s’amiarà a tèrme ua accion de sensibilizacion de detectores de persones damb solitud non desirada, laguens eth Programa Ligams, dirigida ara ciutadania e orientada a facilitar estruments entà saber coma actuar deuant possibles situacions de solitud.
En airau des familhes, eth Servici En Familha e eth CDIAP Aran aufrissen pendent eth més d’octobre espacis de supòrt a familhes damb mainatges damb parrabastatge der espèctre autista, atau coma un espaci de supòrt e guariment compartidi entre parièrs.
Eth programa incorpòre egalaments eth cicle Sabers Collectius III: «Deth silenci ara paraula», impulsat peth Servici entàs Drets des Hemnes e des Persones LGTBIQ+, damb un grop dedicat as procèssi migratorios e eth dòl, e d’aute espaci ath torn des experiéncies de hemnes qu’an viscut situacions de violéncies masclistes. Ath delà, Amentaran impulse espacis coma Danzarte, un talhèr de dança terapeutica e movement conscient, e «Apren a trabalhar eth tòn uart», qu’utilize eth contacte damb era natura e era activitat compartida coma oportunitats entà favorir eth benèster emocionau.
Hèr visible un hilat de benèster que dejà existís
Mès enlà des activitats puntuaus deth mes d’octobre, eth programa vò hèr visible eth hilat d’espacis estables qu’era Val d¡Aran dejà dispòse entà favorir eth benestar des persones: espacis de supòrt a familhes, grops comunitaris, activitats de movement e salut, recorsi entà joeni e mainatges, espacis entà persones granes, servicis d’acompanhament e supòrt entre parièrs.
Aguesta guardada ei un des elements centraus deth Plan d’Accion Comunitària: connectar aquerò que dejà existís, generar naues oportunitats de participacion e facilitar qu’es persones poguen trobar espacis pròplèus a on restacar-se, participar, exprimir-se e senter-se acompanhades.
Eth programa d’octobre met atau eth foguièr en ua idèa compartida: era salut mentau e eth benèster emocionau son un ahèr de tota era comunitat e de totes es estapes dera vida, e era sua promocion passe tanben entà bastir entorns a on es persones poguen crear ligams, auer supòrt e hèr part activa dera comunitat.
