Eth Conselh Generau d’Aran, a trauès der Airau de Patrimòni, a hèt ua intervencion d’urgéncia ena glèisa de Sant Fèlix de Vilac pr’amor dera nauta preséncia de coloms, majoritàriament, e d’auti audèths, en campanau.
Eth naut nombre d’aguesti audèths auie ocasionat ua grana acumulacion d’excrements en solèr, enes parets, cabirons, baranes e d’auti elements der interior deth campanau, e auie generat ua zòna insalubra e perilhosa entar accès des persones.
Era intervencion, qu’a durat ath torn d’ua setmana, a permés desinfectar er espaci, eliminar es nins e retirar es audèths mòrti, e tanben netejar es acumulacions d’excrements per part dera Brigada de Servicis deth Conselh Generau. Ath madeish temps, s’an installat rèishes de proteccion enes horats dera façada, coma hièstres, hiestraus e petiti horats, damb er objectiu de dificultar era entrada de mès audèths e evitar qu’era situacion se repetisque.
Ath long des dies que vien se completarà era intervencion damb ua neteja a hons deth campanau, que permeterà eliminar es rèstes e acumulacions qu’encara i a e deishar er espaci en bones condicions.
Era glèisa de Sant Fèlix de Vilac ei catalogada coma Ben Culturau d’Interès Locau (BCIL), e aguesta intervencion s’includís ena gestion e proteccion deth patrimòni istoric e artistic dera Val d’Aran.
Eth còst totau dera intervencion, assumida peth Conselh Generau, a estat de 10.673,05 euros.
