Eth dissabte 29 d’agost, era Val d’Aran tornarà a èster un gran circuït de montanha. Es camins que connècten es pòbles serviràn, un còp mès, d’itinerari tara 29au edicion dera Corsa e caminada des 15 pòbles, que damb gessuda en Es Bòrdes e arribada en Vielha ei ua cita arraïtzada en calendari esportiu aranés.
De bon maitin, es corredors e es caminaires gesseràn entà recórrer ua part dera Val d’Aran que, a pè, se descorbís d’ua manèra diferenta. Es pòbles, es montanhes e es camins seràn eth scenari d’ua jornada que combine era exigéncia esportiva damb eth caractèr mès popular e participatiu dera caminada. Era Corsa des 15 pòbles ei eth gran rèpte dera jornada: 21,50 quilomètres e +1.132 mètres de desnivèu positiu. Damb gessuda e arribada en Es Bòrdes, eth recorrut passarà per Vilamòs, Pònt d’Arròs, Betlan e Vielha.
Era gessuda serà tàs 9.00 ores. Entà qui volgue un recorrut mès cuert, era Corsa Trofèu Arturo Riba aufrís 11,20 quilomètres e +440 mètres de desnivèu, tanben damb gessuda en Es Bòrdes e passant per Pònt d’Arròs, Betlan e Vielha. Era sua gessuda ei prevista tàs 9.00 ores. Es caminaires tanben haràn eth sòn pròpi camin entà víuer era jornada. Era caminada de 15 quilomètres, damb +690 mètres de desnivèu. E, entàs mès joeni, era jornada compde damb dues opcions: era Corsa Trofèu Roland Giné, de 4,4 quilomètres e +60 mètres de desnivèu, e era caminada de 5 quilomètres, damb eth madeish recorrut.
Es dues auràn era gessuda en Betlan, tàs 11:00 ores, e era arribada en Vielha. Era corsa joena ei adreçada a participants neishuts entre 2013 e 2023. Es inscripcions son dubèrtes on line e eth diuendres 28, de manèra presenciau, des 17:00 as 20:00 ena sala polivalenta de Vielha. Es prètzi son de 30 € entara Corsa 15 Pòbles; 25 € entara Corsa Trofèu Arturo Riba e entara Caminada de 15 km; e 10 € entara Corsa Trofèu Roland Giné e era Caminada 5K. Era 29au edicion dera Corsa e caminada des 15 pòbles ei organizada per Èm Aran Sports Foundation, damb eth supòrt des institucions e entitats collaboradores dera Val d’Aran.
