Eth Conselh Generau d’Aran a publicat es bases reguladores tara concession d’ajudes de supòrt socioeducatiu adreçades a escolans e escolanes qu’estúdien en centres publics dera Val d’Aran entath cors 2024/2025.
Damb aguestes bases se vò regular eth marc generau de concession individuau ad aqueri estudiants dera Val d’Aran que presenten dificultats sociaus, economiques o des dus tipes. Es ajudes son en concèpte de minjador escolar, libres e materiau escolar e activitats socioeducatives prescrites pes professionaus des servicis sociaus.
Era ajuda individuau l’a de sollicitar era familha mejançant eth modèl establit ar efècte e er autrejament se determine en foncion des règles deth barèm que fixen aguestes bases e qu’a en compde era situacion dera familha sollicitaira.
Son beneficiaris es escolans qu’estúdien ensenhament infantil e ensenhaments obligatòris enes centres publics ordinaris deth Departament d’Educacion ena Val d’Aran.
Tanben an de complir aguestes condicions:
a) Auer presentat enes tèrmes establidi, era sollicitud e era documentacion demanada.
b) Auer un plan de trabalh damb Servicis Sociaus o compromís entà establir-lo.
c) Obtier era puntuacion minima fixada d’aguestes bases que hèn referéncia ara situacion sociau e economica dera familha.
Non se poiràn acuélher ad aguesta convocatòria es escolans qu’an dret ath servici de minjador de caractèr preceptiu e gratuït. Ar efècte d’aguestes bases, s’enten per unitat familiau era integrada pes progenitors o tutors legaus, o per quinsevolh d’eri, e es menors de 18 ans, tostemp que convisquen damb era familha.
Eth tèrme de presentacion des sollicituds tà libres – materiau escolar e minjador corresponentes ath cors escolar 2024/2025 ei des dera publicacion d’aué d’aguestes bases en BOP de Lleida e ena pagina web deth Conselh Generau d’Aran e serà dubèrt enquiath 21 d’agost deth 2024. Era convocatòria entàs ajudes en concèpte d’activitats socioeducatives seguirà dubèrta.
