Coma cada an, eth hilat de Musèus dera Val d’Aran s’a hijut ara iniciativa mondiau der ICOM (International Council of Museums), que promò qu’es musèus organizen activitats ath torn deth 18 de mai (Dia Internacionau). Enguan, es activitats de dinamizacion auràn en comun era tematica que se trabalhe pendent tot eth 2026 enes Musèus dera Val d’Aran: era enfança. Es actes principaus se haràn en Musèu dera Val d’Aran de Vielha e en Unha.
A compdar deth diuendres 15 de mai, ena recepcion deth Musèu dera Val d’Aran se poderà veir era exposicion “En casa o ena consulta. Medecina e enfança en Aran”. Aguesta petita mòstra remasse es hites mès importantes dera istòria dera sanitat ena Val d’Aran, es protagonistes que merquèren a fòrça generacions e presente esturments medicaus originaus d’inicis deth sègle XX. D’aguestes pèces, n’i a que hègen a servir quan es hemnes desocupauen.
Entà conéisher damb mès detalh era exposicion, ath long d’aguesti dies eth public aurà era possibilitat d’assistir a quauqu’ues des activitats organizades ath torn d’aguesta:
- Diuendres, 15 de mai, a compdar des 19 ores, Joan Carlos Riera Socasau, doctor en Medicina e membre dera Reial Acadèmia de Medicina de Catalunya, presentarà era exposicion. Ara seguida, impartirà era charrada “Cinc des que mos cuedèren”, en allusion as mètges deth sègle XX Navarro, Riart, Campà, De Miguel e Vidal.
- Dimenge, 18 de mai, tàs 10 ores, J. Carlos Riera amiarà a tèrme era visita guidada dera exposicion, en tot basar-se enes pèces presentades.
- Deluns, 19 de mai, tàs 11.30 ores, “Passam consulta damb ADDA”, perque en companhia des membres d’aguesta associacion se harà era visita guidada, seguida d’un talhèr participatiu; es dues activitats son dubèrtes a toti es publics.
Era enfança e, concretament, es familhes, seràn es protagonistes des activitats de dissabte, 16 de mai, que se haràn ath dauant deth Musèu dera Nhèu d’Unha. En aguest cas, serà eth personau d’accion educativa deth Parc Nacionau eth que dinamizarà eth maitin a trauès de dus jòcs: er ArqueoParc (tàs 11 ores) e er “Escape room arqueologic”.
Entà participar-i cau reservar es places en Musèu dera Val d’Aran. Entà poder gaudir des musèus, se poderàn visitar aguesti quate equipaments de manèra gratuïta enes oraris que seguissen:
- Musèu dera Val d’Aran, Vielha Dissabte, 16 de mai, de 10-13.30 e de 17-22 ores* Dimenge, 17 de mai, de 10-13.30 ores Deluns, 18 de mai, de 10-13.30 ores *Daurim enquias 22 ores en motiu dera Net des Musèus
- Ecomusèu çò de Joanchiquet, Vilamòs Dissabte, 16 de mai, de 11-14 e de 16-19 ores Dimenge, 17 de mai, de 11-14 ores
- Casa deth Haro. Musèu des hèstes deth huec, Les Dissabte, 16 de mai, de 11-14 e de 16-19 ores Dimenge, 17 de mai, de 11-14 e de 16-19 ores
- Musèu dera Nhèu, Unha Dissabte, 16 de mai, de 17-20 ores Deluns, 18 de mai, de 10-13 ores
Entà mès informacion o consultes, podetz contactar damb eth Musèu dera Val d’Aran, de manèra presenciau o telefonica (973 64 18 15).
