Eth Vicesindic dusau e conselhèr d’Innovacion e Gestion Ambientau, Oriol Sala, s’a desplaçat aguest maitin tàs escòles Sant Ròc de Bossòst, e Garona de Vielha entà visitar eth projècte qu’impulse eth govèrn d’Aran entà trabalhar era educacion ambientau enes escòles araneses.
Aguesta iniciativa a coma objectiu fomentar era remassada selectiva e eth compostatge des residus organics en airau escolar, en tot promòir era educacion ambientau e era sostenibilitat entre er escolanat. Era iniciativa forme part dera estratègia deth Conselh Generau d’Aran entà melhorar era gestion des residus en territòri e compde damb era collaboracion n’aguest cas des escòles de Bossòst e Vielha.
Tath conselhèr, Oriol Sala: “Damb aguesta actuacion, eth govèrn aranés reafirme eth sòn compromís damb era sostenibilitat e era transicion ecologica, en tot trabalhar amassa damb era Escòla Aranesa ena transmission des valors ambientaus a tota era mainadèra”.
