Eth Conselh Generau d’Aran a adaptat ar aranés 11 cançons d’aguesta cantata educativa, que ja se trebalhen enes escòles de primària Alejandro Casona de Les, Sant Ròc de Bossòst, Escòla Garona de Vielha e es ZER deth territòri.
Es mèstres de musica des centres educatius, que ja hè quauqui mesi que i trebalhen, s’encueden dera adaptacion musicau e de trasméter eth coneishement ar escolanat.
Era Clika ei un projècte dera Casa de la Música que trebalhe eth cant e eth moviment enes classes de musica, a trauès d’onze cançons qu’aufrissen era possibilitat de parlar enes aules de sentiments, emocions, amistat, respècte o deth mèdiambient. Ath long de tot eth cors escolar se trabalhe damb disparièrs estils musicaus e eth projècte s’acabe damb era participacion der escolanat en ua cantata toti amassa.
Aguest projècte musicau e educatiu se poirà escotar ena lengua pròpria d’Aran en un acte programat tath mes de junh, includit laguens der “Hestau Terson” e que compde damb eth supòrt deth Conselh Generau d’Aran, La Casa de la Música, es direccions des centres educatius, es mèstres de musica des escòles e eth Centre de Recorsi Pedagogics.
