Eth conselhèr d’Espòrts deth Conselh Generau d’Aran a assistit aguest maitin, ena Deputacion de Lleida, tara presentacion des pròves deth Freeride World Tour e eslalòm d’esquí aupín, que se haràn ena estacion dera Val d’Aran e Valls d’Àneu entre es mesi de gèr e hereuèr deth 2025.
Deth 18 ath 23 de gèr, es milhors riders d’esquí e snowboard internacionaus se traparàn en ua des pròves dera 4au edicion deth FWT en Baqueira. Coma nauetat, aguest iuèrn, es dies 6 e 7 d’hereuèr es milhors esquiaires deth continent europèu disputaràn dus eslalòms dera Copa d’Euròpa d’esquí aupin, en Beret.
Tath conselhèr Cavero: “Des deth govèrn aranés valoram positivament aguesta collaboracion damb eth sector privat, que mos ajude a impulsar toristicament eth territòri, damb garanties que sigue d’ua manèra sostenibla e responsabla”. E a hijut: “Aguestes dues pròves mos dan era oportunitat de daurir es nòstes pòrtes as visitaires e gent deth país, que volguen gaudir de víuer en dirècte as milhors esportistes d’elèit mondiau en nòste territòri, damb ua gastronomia, cultura e patrimòni que non passaràn desapercebudi”.
