Pr’amor der incendi d’ager, 15 de junh, en un edifici de Vielha, es Servicis Sociaus deth Conselh Generau d’Aran, en coordinacion damb er Ajuntament de Vielha e Mijaran, an activat de manèra immediata un dispositiu d’atencion e supòrt entàs persones afectades.
A prumèra ora deth maitin se constituïc ua equipa de crisi formada per ua psicològa, ua trabalhadora sociau e era directora des Servicis Sociaus, que s’encuedèren des persones afectades e coordinèren es besonhs mès immediats derivadi dera emergéncia.
Ath long dera jornada s’atenguec dirèctament a un totau de ueit persones adultes e dus mainatges, aufrint-les supòrt emocionau, orientacion, acompanhament e ajuda ena comunicacion damb es familhes e persones deth sòn entorn. Tanben se coordinèc era disponibilitat d’un espaci segur e propèr ar immòble afectat entà qu’es persones podessen èster amassa e recéber informacion actualizada sus era evolucion des trabalhs d’extincion.
Gràcies ara collaboracion d’un establiment de restauracion dera zòna, qu’aufric de manèra immediata un espaci d’acuelhuda, se poderen garantir tanben es besonhs basics d’alimentacion e idratacion des persones afectades pendent es prumères ores dera emergéncia.
Malerosament, tà meddia se localizèc sense vida a un des vesins der immòble. Dauant d’aguesta situacion, era equipa de crisi intensifiquèc er acompanhament psicologic e emocionau as familhes e ara rèsta de persones afectades, en un moment especiaument dificil.
Es Servicis Sociaus deth Conselh Generau d’Aran vòlen relheuar era bona coordinacion mantenguda ath long de tota era jornada damb es diferenti còssi d’emergéncia, especiaument damb es Pompièrs e es Mossos d’Esquadra, atau comdamb er Ajuntament de Vielha e Mijaran, que siguec en contacte permanent damb es equipes professionaus e es persones afectades.
Aguesta collaboracion permetec garantir qu’es persones recebessen informacion puntuau sus es auanci dera emergéncia, tostemp damb era sensibilitat e prudéncia necessàries dauant d’ua situacion de gran impacte emocionau.
Era comunicacion des informacions mès delicades se hec de manèra coordinada entre toti es professionaus implicadi, entà priorizar en tot moment eth benèster emocionau des persones afectades e sajant de minimizar-ne er impacte.
Atau madeish, pendent eth maitin s’establic coordinacion damb Càritas Val d’Aran, entitat a qui se vò manifestar un arregraïment especiau pera sua responsa rapida, per auer facilitat productes d’igièna personau e ròba entà corbir es besonhs mès immediats des persones afectades.
Des dera madeisha net de deluns se proporcionèc lotjament temporau a nau persones, qu’ath long des dies que vien encara receberàn acompanhament des Servicis Sociaus ena recèrca d’abitatge e ena tramitacion dera documentacion e des ajudes que poguen auer de besonh.
Eth Conselh Generau d’Aran vò arregraïr era professionalitat, implicacion e coordinacion de totes es equipes qu’an intervengut en aguesta emergéncia. Era collaboracion entre administracions, còssi d’emergéncies, entitats sociaus e establiments deth municipi a estat fondamentau entà garantir ua atencion integrau e umana as persones afectades des deth prumèr moment.
