Ager realizèrem era amassada de lançament deth pionèr pilòt de servicis de contròtle e seguretat damb dròns, operadi pera empresa locau Cargo Drone entà susvelhar es competicions mès longues e exigentes dera Val d’Aran by UTMB. Aguesta iniciativa, prepausada peth Conselh Generau d’Aran compde damb eth finançament des dues empreses araneses, dera Generalitat de Catalunya e er IDAPA coma projècte laguens dera estrategia des Àrees Digitals.
Es condicions extrèmes de nocturnitat e trajèctes damb zònes de cobertura limitada des tres carrères seleccionades: eth Torn dera Val d’Aran (VDA) de 163 kilomètres, es Camins de Hèr (CDH) de 110 kilomètres e es Peades d’Aigua (PDA) de 55 kilomètres, autan coma era participacion multitudinària damb un totau de mès de 6.000 participaires, hèn qu’aguestes corses presenten ua nauta complexitat adienta entara gestion auançada operativa damb dròns. Prètzhèts de susvelhança que complementen e milhoren es sistèmes de gestion de seguretat qu’era UTMB ja amie a tèrme en totes es sues pròves.
Era “UTMB Aran Dron” includís en sòn conjunt: un estudi previ de seguretat, era gestion regulatòria, era prospeccion deth terrenh, es silumlacres d’actuacion e era direccion des missions e, transmission e coordinacion en dirècte damb eth Centre de coordinacion (CECOR). Ara finalizacion d’aguestes competicions, s’autrejarà un àmas d’informes tecnics damb er objectiu d’avalorar er impacte d’aguesta pròva pilòt.
Servici de gestion auançada damb dròns en corses de montanha de nauta complexitat
En prumèr lòc, s’amiarà a tèrme un simulacre de cèrca pendent era corsa PDA en zònes de bòsc dehòra deth traçat oficiau mejançant ua camèra termica e de vision nocturna, entà validar es temps de cèrca, era cadea de comunicacion damb eth CECOR e damb es servicis d’emergéncia.
Dejà, pendent era realizacion dera CDH, s’inspeccionarà tota era traça abans deth cap de corsa en tot documentar visuaument a temps reau er estat des balisses, es avitualhament e eth contròtle d’objectàcles subervengudi. Entara competicion damb major dificultat, era VDA, s’activarà ua operacion damb camèra termica, sensors de vision nocturna e lums anticolicion actives e un acompanhament de seguretat entath tancament deth tram. En andús casi, s’an premanit es operatius entàs opcions de meteorologia adversa.
Aguesta pròva pilòt, balharà assisténcia aeriana de supòrt damb dròns professionaus certificadi e optimizadi entà operacion BVLOS (mès enlà dera capacitat visuau) e estacions automatizades, operant jos eth marc regulatòri europèu pendent 10 ores ena CDH e 15 ores ath long dera VDA.
Un projècte sorgit en Airau Digitau Aran
A trauès de HèPic, eth centre d’innovacion territoriau deth Conselh Generau d’Aran e era Generalitat de Catalunya, a trauès dera Secretaria de Politiques Digitaus deth Departament d’Empresa e Trabalh e er IDAPA, s’a finançat conjuntament damb es empreses UTMB Iberia e Cargo Drone aguest pilòt en marc dera iniciatiua Àrees Digitals, impulsada peth Govèrn damb eth supòrt deth centre de recèrca i2CAT entà fomentar er ecosistèma e es estrategies d’aplicacion de tecnologies digitaus auançades en tot Catalonha e generar atau naui projèctes e inversion en innovacion e desvolopament en territòri.
En aguest cas, eth projècte ei adscrit ar Airau Digitau Aran, que compde damb eth supòrt locau deth Conselh Generau d’Aran, er Institut entath Desvolopament e era Promocion der Alt Pirineu e Aran (IDAPA), era Diputació de Lleida e era Cambra de Comerç de Lleida.
En paraules deth conselhèr d’innovacion deth Conselh Generau, Oriol Sala: “Era UTMB Aran Drone ei era prumèra pròva de gestion auançada de seguretat damb dròns que s’amie a tèrme en corses de montanha que presenten caracteristiques d’elevada complexitat coma son es de Val d’Aran by UTMB. Damb Cargo Drone coma proveïdora tecnologica, es dues empreses deth territòri an un naut valor tecnologic hijut, e compden damb eth nòste supòrt entà susvelhar e milhorar era seguretat en un eveniment esportiu massiu”.
