Eth Conselh Generau d’Aran a començat es trabalhs de manteniment e adequacion ena glèisa de Sant Sernilh de Canejan, damb er objectiu de preservar e garantir era seguretat e eth bon estat de conservacion d’aguest element deth patrimòni arquitectonic dera Val d’Aran.
Entre es accions previstes, se trabalhe ena rejunta des pèires des escales, entà nivelar-les e remplaçar eth ciment en mau estat. Tanben se polirà era pòrta principau, damb era rejunta des henerècles e repintada, tant dera husta com des riblatges metallics, e era substitucion deth veire trincat. En çò que tanh ath relòtge solar, se repintarà era esfèra e eth marcatge numeric. En interior, ena paret dera absida se harà eth sanejament des antiques umitats, eth farciment des taques e henerècles, e era repintada dera façada interiora.
Aguestes accions son part deth compromís deth Conselh Generau d’Aran damb era proteccion deth sòn patrimòni istoric, culturau e religiós, e s’inscriuen laguens des politiques de conservacion activa d’equipaments e edificis d’interès entara ciutadania e es visitants.
