A començament d’octobre se harà era dusau edicion deth cors en Aran sus coneishements basics e fòrça practics d’intelligéncia artificiau. Ua formacion gratuïta e dubèrta a toti es publics que vò apropar aguesta naua airina tecnologica entà hèr-la mès accessibla e utila, sustot entara sua aplicacion en sector professionau.
Es fondadors dera empresa d’intelligéncia artificiau DiiP son dus joeni aranesi, José Solà e David Santana, qu’an premanit eth contengut deth cors e qu’amassa damb er aranés Francis Nieto, ne seràn es formadors. Eth format deth cors serà presenciau e s’impartirà ena Aula de Formacion deth Conselh Generau, plaçada ena carretèra de Gausac, 1, baishi, de Vielha.
Aguesta formacion aurà ua durada totau de 30 ores e es leçons seràn es dimèrcles, de 17 a 20 ores, de començament d’octobre enquiath 10 de deseme. Entà poder-se inscríuer cau enviar un corrèu electronic damb es dades personaus (nòm, cognòm e telefòn) entath corrèu electronic: infohepic@aran.org o escanejant eth QR, e completar eth formulari d’inscripcion.
Aguest cors tanben ei pensat entàs persones que son en caumatge ena Val d’Aran entà que poguen aquerir naues abiletats e auer facilitats entà reincorporar-se entath mon laborau.
Eth conselhèr d’innovacion, Oriol Sala, a remercat que: “arténher coneishements sus eth foncionament d’ua airina tan nauedosa coma era intelligéncia artificiau apròpe ara ciutadania d’Aran ara avantguarda dera tecnologia. E encara mès a trauès de professionaus deth sector que son joeni aranesi”.
Aguest ei un des projèctes ideadi per HèPic, eth centre d’innovacion territoriau deth Conselh Generau d’Aran (CIT Aran) e finançat pera Cambra de Comerç de Lleida damb er objectiu comun d’aufrir airines de fòrça utilitat entà impulsar eth sector professionau e tecnologic d’Aran.
Ligam d’inscripcion: Cors tà apréner airines professionaus d’Intelligéncia Artificiau
