Eth Conselh Generau d’Aran e era Generalitat de Catalunya constituïen eth passat dia 12 de junh era Comission Mixta de torisme, consum e promocion economica tà actualizar es traspassi de competéncies en aguesti airaus.
Eth secretari generau d’Empresa e Trabalh, Pol Gibert, era directora generau de Torisme, Cristina Lagé, e eth secretari d’Empresa i Competitivitat, Jaume Baró, s’an amassat damb era sindica d’Aran, Maria Vergés, e eth conselhèr de Torisme e Promocion Economica,Josep Canut entà avalorar era situacion actuau deth procès de transferéncia e entà definir es besonhs dera Val d’Aran n’aguesti encastres.
Aguesta Comission, a quedat finaument constituïda, en tot atau contunhar damb era planificacion deth procès de transferéncia de competéncies previst ena Lei 1/2015, q’establís eth regim especiau d’Aran. Segontes era sindica d’Aran “Aguest trabalh a de perméter qu’eth Conselh Generau d’Aran exercisque de manèra efectiva es foncions que li corresponen autant en matèria de torisme, un traspàs que non s’a actualizat de 1997 ençà, coma en matèria de promocion economica entà, n’aguest darrèra cas, acabar d’impulsar es estratègies de diversificacion economica e retencion de talent qu’eth govèrn d’Aran amie a tèrme”
Aguest procès de transferéncia se fondamente en un compromís per part des dues institucions, Conselh Generau d’Aran e Generalitat de Catalunya, damb er objectiu de consolidar er autogovèrn d’Aran de manèra ordenada, consensuada e ajustada ath marc legau vigent.
Un pas de besonh entà enfortir es competéncies pròpies d’Aran en encastres estrategics tath desvolopament economic e sociau deth territòri, contribusïnt a milhorar era calitat de vida dera sua ciutadaneitat e ara ora garantir-ne era sostenibilitat e eth futur dera Val d’Aran.
