Eth Conselh Generau d’Aran, a trauès deth sòn Airau d’Espòrts, presentarà aguest diuendres dus documentaus, des esportistes d’elèit, Lydia Iglesias e Aymar Navarro, en ua celebracion qu’amasse er espòrt e eth talent aranés.
Er acte, que compdarà damb era preséncia des dus protagonistes, serà ua premier des projeccions “IMPROVISE-ADAPT-OVERCOME-You never plan enough” dera esportista d’esquí de hons e ciclista professionau, Lydia Iglesias e “ENDELING by SEIKO” e “MOKKAIDO DREAMS by Therm-ic” deth freerider Aymar Navarro, aguesta darrèra jos era direccion de Jaime Varela, ua produccion de Jprod.
Es films que se projectaràn expliquen es viatges, es rèptes e es hites artenhudes per dus referents der espòrt aranés, Lydia Iglesias, exfondista dera equipa nacionau d’esquí de hons e actuaument ciclista de naut nivèu en Gravel e Aymar Navarro, un des esquiadors mès renomadi d’Espanha e ambaishador deth freeride des Pirenèus gràcies as sòns projèctes audiovisuaus e ara sua participacion en Freeride World Tour, a on competissen es milhors freeriders deth mon.
Tath conselhèr d’Espòrts, Javier Cavero: “Aguest eveniment a coma objectiu méter en valor era importància der espòrt ena societat aranesa e remercar eth sòn papèr coma airina de transformacion personau e collectiva, gràcies a valors com era superacion, eth trabalh en equipa e eth respècte per entorn”.
Er acte aurà lòc ena Plaça d’Aran (ath dauant deth Conselh Generau) tàs 19.00 ores e serà dubèrt a tota era comunautat esportiva dera Val d’Aran, vesins e visitants que s’i volguen apropar, era entrada ei gratuïta, e ara seguida s’aufrirà ua chicolatada entà toti es presents.
