Eth projècte BòscAran a recebut aué, en Madrid, eth prèmi CONAMA, laguens des jornades deth Congreso Internacional del Medioambiente, consolidat com eth principau fòrum de dialòg e accion ath torn dera sostenibilitat en Espanha.
Eth conselhèr d’Infrastructures e Òbres, José Luis Boya, a recebut eth guerdon en ua des categories premiades, catalogada tà territòris d’entre 5.000 a 30.000 abitants, e ara seguida a presentat eth projècte amassa damb un des tecnics der airau Forestau deth Conselh Generau d’Aran.
BòscAran, impulsat damb eth supòrt dera majoritat d’ajuntaments e entitats municipaus araneses e deth Centre Tecnològic Forestal de Catalunya, a coma principau objectiu era reactivacion dera gestion forestau sostenibla des bòsqui aranesi e era transicion ecologica e energetica verda, ua apòsta fèrma tà amendrir era dependéncia des recorsi energetics fossils.
Entà eth conselhèr Boya; “Aguest projècte mos a de perméter auer uns bòsqui mès resilients ath cambi climatic e as incendis, ath temps que profitam era biomassa entà hèr possibla era descarbonizacion en nòste territòri”. A hijut: “des deth govèrn aranés volem arregraïr aguest reconeishement e refermam que vam peth bon camin entà arténher era sostenibilitat territoriau”.
