Eth govèrn aranés a aprovat aué, en plen ordinari que s’a hèt ena casa deth Senhor d’Arròs, era modificacion deth reglament d’aunors e distincions deth Conselh Generau d’Aran, un reglament aprovat d’inici eth 19 de mai de 2022. Aguesta modificacion establís eth besonh, finalitat e caracteristiques des distincions a implantar entà reconéisher er esfòrç e era dedicacion des membres deth Còs de Pompièrs d’Aran e a compdat damb es vòts a favor des grups politics d’UA e CDA.
Atau madeish eth plen a aprovat tanben eth reglament qu’a de regular eth era cartèra de prestacions deth Servici d’Atencion en Entorn Domiciliari (SAED), damb es vòts a favor d’Unitat d’Aran e CDA.
Cau rebrembar qu’eth SAED ei en foncionament de hè dus ans coma pròva pilòt entà conéisher er impacte e besonhs qu’aguest tipe de servici podie auer en Aran. Ara, passat aguest temps, eth govèrn aranés implementarà aguest servici de manèra reglada.
Aguest reglament a per objècte regular eth SAED, que forme part dera cartèra des Servicis Assistenciaus Integradi d’Aran.
Eth SAED a caractèr preventiu, socioeducatiu, assistenciau e integrador e aufrís as persones qu’ac an de besonh eth supòrt ena realizacion de prètzhèts de suenh personau, acompanhament, supòrt domestic, supòrt ara autonomia personau e supòrt sociau entà que poguen demorar en casa sua, s’ac desiren, e en quinsevolh etapa dera sua vida.
Aguest servici aufrís supòrt as familhes, enes suenhs, facilite instruments tecnics e tanben supòrt sociau entà previer o compensar es pèrtes d’autonomia personau, atau com es dificultats de desvolopament o integracion sociau a trauès de desparières prestacions, programes e accions que s’i emmarquen. Es servicis d’atencion ar entorn domiciliari s’adrecen a persones empadronades enes municipis deth territòri e que viuen de manèra abituau en Aran.
