A compdar deth 18 de seteme, començarà eth prumèr cors en Aran sus coneishements basics e fòrça practics d’intelligéncia artificiau. Ua formacion gratuïta e dubèrta a toti es publics que vò apropar aguesta naua airina tecnologica entà hèr-la mès accessibla e utila, sustot entara sua aplicacion en airau professionau.
Es formadors qu’an premanit eth contengut deth cors son dus joeni aranesi, José Solà e David Santana, fondadors dera empresa d’intelligéncia artificiau DiiP. Eth format deth cors serà presenciau e s’impartirà ena Aula de Formacion deth Conselh Generau, plaçada ena carretera de Gausach,1, baishi, de Vielha.
Aguesta formacion aurà ua durada de 30 ores e es leçons se realizaràn toti es dimèrcles, de 16 a 19 ores, deth 18 de seteme enquiath 27 de noveme. Entà poder-se inscríuer ei de besonh enviar un corrèu electronic damb es donades personaus (nòm, cognòm e telefon) ath corrèu electronic: infohepic@aran.org.
Eth conselhèr d’innovacion, Oriol Sala, a remercat que “arténher coneishements sus eth foncionament d’ua airina tan nauedosa coma era intelligéncia artificiaus, apròpe ara ciutadania d’Aran tara avanguardia dera tecnologia. E encara mès a trauès de professionaus deth sector que son joeni aranesi”.
Aguest ei un des projèctes ideat per HèPic, eth hub d’innovacion deth Conselh Generau d’Aran e finançat pera Cambra de Comèrç de Lleida damb er objectiu comun d’aufrir airines de fòrça utilitat entà impulsar eth sector professionau d’Aran.
